لاجـــــلك أنا عـــــديـــــــــت
,,,,,,,,,,,,,,,,,,,,,,,,,,,,,,,,
عديت بلاد وبلاد وجيتلك من زمن
دا لأنك انت الدنيا ..
والوطن اللى دايبه فى نظرته
قالوا : يا ريت .. من بكره تنسى دنيته
رديت : لا يمكن روحى فى النسيان تغيب
يا حبيب حياتى وذكرياتى يا حبيب
أنا جايّه لاجل لقاك ..وجوه عنيك أدوب
ما اقدرش عن قربك أتوب
دا انا كل يوم .. باستنى منك كلمه
تطفى حسرتى
أو لمسه تملى دنيتى .. بالأمنيات
يا اللى انت أحلى الذكريات
والحب لو طاهر .. عفيف
قادر تضيف .. أشياء كتير .. على سكتى
رجعلى تانى نظرتى
صدقنى لو تلقانى شمعه منوره فى رحلتك
صدقنى لو أصبح طيور فوق نخلتك
مشتاقه ليك .. شوق البلابل للفروع
شوق الضلامه للشموع
شوق العيون ..لحبيب يجفف فى الدموع
ويكون طبيب لاجل الجراح
راح اللى راح يا حبيبى ..وانت الباقى
لىّ ع الجبل
آه يا أمل
إيه اللى خلى الدنيا تتجدد بنظره من
عنيك
إيه اللى خلى الراحه تصبح بين إيديك
إيه اللى خلى الروح عليك متلهفه
دا لأنك انت العمر وشطوط الدفا
دا لأنك انت الذكريات ..المبهجه .. والمؤلمه
لو حتى سكة عمرى كانت يا حبيبى مضلمه
تطلع نجومك لاجل تهدى خطوتى
آه يا حياتى ودنيتى
مش لاقيه غيرك ع الدروب ..يهدينى
للسكه الحلال
مش لاقيه إلا نداك وانا ..تايهه ما
بين كل التلال
فبلاش فراق
أرجوك يا روح قلبى الرقيق
كون فى الطريق
شجر الحنان والإشتياق
واحمينى لو تاهت خطايا فى العدم
إسقينى من بحر النغم
ياما قاسيت فى الدنيا من نار الألم
نادى علىّ بصوتك النسمه الجميل
من غير شعور
قلبى فى لحظة حبى هايردد نداك
ويقول نعم
....................
✍...عبيـــــــــــــــرالجنـــــــدي ...
ليست هناك تعليقات:
إرسال تعليق